في كل مرة سنقرأ قصيدة أو جزءاً من قصيدة أو حتى بيتا واحداً فقط لأحد الشعراء المعروفين أو غير المعروفين اسماً، وإن بقيت أشعارهم هذه أبداً، نفعل ذلك بحثاً عن "شوية هوا" نتنفسهم عبر كلمات معطرة يبقى رحيقها طويلاً طويلاً..هم مين وإحنا مين
هم الأمرا والسلاطين
هم المال والحكم معاهم
وإحنا فقرا ومحكومين
حزّر فزّر شغّل مخّك
شوف مين فينا بيحكم مين
إحنا مين وهم مين
إحنا الفُعَلا البَنَّايين
إحنا السُّنّة وإحنا الفرض
إحنا الناس
بالطول والعرض
من عافيتنا تقوم الأرض
وعرقنا يخضّر بساتين
حزّر فزّر شغّل مخّك
شوف مين فينا
بيخدم مين
هم مين وإحنا مين
هم الأمرا والسلاطين
هم الفيلا والعربية
والنساوين المتنقية.. طبعاً
حيوانات استهلاكية
شغلتهم حشْوِ المصارين
حزّر فزّر شغّل مخّك
شوف مين فينا بياكل مين
إحنا مين وهم مين
إحنا قرنفل على ياسمين
إحنا الحرب حطبها ونارها
إحنا الجيش اللي يحررها
وإحنا الشهدا في كل مدارها
منتصرين أو منكسرين
حزّر فزّر شغّل مخّك
شوف مين فينا بيقتل مين
هم مين وإحنا مين
هم الأمرا والسلاطين
هم مناظر بالمزيكة
والزفة وشغل البولوتيكا
ودماغهم طبعاً أستيكة
بس البركة في النياشين
حزّر فزّر شغّل مخّك
شوف مين فينا بيخدع مين
هم مين وإحنا مين
هم الأمرا والسلاطين
هم بيلبسوا آخر موضة
وإحنا بنسكن سبعة في أوضة
هم بياكلوا حمام وفراخ
وإحنا الفول دوّخنا وداخ
هم بيمشوا بطيارات
وإحنا نموت في الأوتوبيسات
هم حياتهم تمضي جميلة
هم فصيلة وإحنا فصيلة
حادي يا بادي يا عبد الهادي
راح تفهم قصد الغنوة دي
لمّا الشعب يقوم وينادي
يا إحنا يا هم في الدنيا دي
حزّر فزّر شغّل مخّك
شوف مين فينا هيغلب مين
حزّر فزّر شغّل مخّك.. شوف مين فينا.. بيخدم مين
2 التعليقات:
هما ولاد كلب
هما الباطل واحناالحق
هما الكذب واحنا الصدق
إرسال تعليق
تعليقك يشجعنى على الاستمرار فلا تبخل.